Sa mata’itū ma le toto’a e leoleo i Aukilani le faataunuuina o toe sauniga e talitonuina o se sui o le kegi a le Killer Beez sa faia i le asō.

O sauniga sa faia i le Manukau Memorial Gardens ma e toatele malu o le malo na vaaaia ai o loo latou mata’itū lenei faatasiga.

Sa maitauina foi se solo tele a taavale ma uilaafi i le agai atu i Puhinui Road ma ua faailoa e leoleo ua mae’a faailoa ia i latou o loo auai i ia sauniga o le a lē māmā le silasila a leoleo i ni vaaiga ma ni uiga e ono lamatia ai soifua o isi tagata o loo faaaogaina le alatele i lea taimi.

Sa faalauiloa i se faamatalaga a leoleo i le amataga o le vaiaso e faapea, o lē ua maliu na maliu i le falemai i le mae’a o se faalavelave tau taavale na aafia ai i le vaiaso tonu o le Kings Birthday.

O le faalavelave na tupu i Clover Park na fetoai ai se taavale ma le uilaafi a lē ua maliu.