Ua vaavaai le palemene i le ono tapu ona faaaoga o masini a le malo e tatala ai le app a le TikTok.

 O lea ua iai lipoti o loo mafai e le aufaigaluega a le TikTok o loo i atunuu e lima e aofia ai Saina, ona faitau i faamaumauga a tagata Niu Sila o loo faaaogaina le TikTok e ui i le finau mai o faamaumauga uma nei o loo teu malu i Singapore ma Amerika.

I lipoti a le Newstalk ZB o loo toe faailoa ai o lea o loo mafai lava ona vaai iai inisinia a le TikTok o loo galulue i Amerika, Saina, Peretania, Singapore ma Ireland.

A o iai pea la le popolega o le toatele o isi malo o le TikTok o se app o loo lafi mai ai i tua Saina e gaoi faamaumauga, o loo tumau le teena e le TikTok.

Ae mai le pule sili o auaunaga i le Palemene Rafael Montero, o le faasā o le TikTok ona tatala i luga o meatotino a le malo o loo vaavaai pea iai ae e e le o mautinoa se tali i le taimi nei.

E le i iai foi se finagalo faaalia o le Palemia Chris Hipkins i le mataupu lenei ina ua fesiligia i le Aso Lulu.

O le palemene a Europa o lea ua matuai faasā lava le app a le TikTok ma telefoni a le aufaigaluega, faapea Amerika ma Kanata i telefoni a le malo o loo faaaogaina e ona tagata galulue.