Ua aumai i se tulaga faalauaitele le manaoga o le pulega o le nofoaga o le SENESE o loo a’oa’oina ai tagata e faaletonu le faalogo, pe logonoa.
O se nofoaga i Vaitele o loo faagaioia ai nei lea auaunaga o loo āutovaa foi iai ma tagata o loo anomia ni mea faalogo ona o aafiaga o o latou taliga, ae a’oa’oina ai foi le gagana fai taga poo le sign language.
O le nofoaga lea ua le saogalemu ona e tu lata i le aualatele ae ua vaapiapi foi e fua i le numera e 300 o tagata e iai aafiaga o le faalogo o loo maua le fesoasoani mai le SENESE.
Ua manaomia e le pulega ni Samaria agalelei e ofoina atu se nofoaga tele ma saogalemu e faagaioia ai le latou galuega mo le 2 ma le ‘afa tausaga a o tālia le fausia o le latou nofoaga tutotonu lea ua leva ona faatalitali iai ae e lei faatinoina lava le galuega.
O le susuga Sagato Vaoliko o loo pulea le nofoaga i le taimi nei ma o ia lea ua auala mai ai se pepa o faamatalaga faalauaitele ua saili ai se fesoasoani mo se isi nofoaga e faasee iai.
