E oo mai i le ta o le 9 i le taeao analeila fai mai le Stats NZ e 4,431,326 tagata ua toe faafoi ane a latou pepa faatumu o le tusigaigoa poo le census sa faatino a le atunuu a o tuuina atu ai pea ma le faaaliga ia i latou e lei tuuina ane pepa faatumu ina ia faataunuu ane pepa uma i le ofisa i le aso mulimulil a taeao, sei vagana nai faaitu na afaina tele i aafiaga o le afā o loo tuu iai seia oo atu i le aso muamua o Iuni e tuuina ane ai a latou pepa faatumu.
O le masina o Fepuari na saunoa ai le minisita o le matagaluega o fuainumera, Dr Deborah Russell e faapea o le 90 pasene o le atunuu ua sauni e faia le tusigaigoa peitai ina ua toe fesiligia i le vaiaso nei i le mataupu lea na ta’ua e le minisita e oo mai i le faaiuga o Aperila o le tali ane a tagata o loo taatia i le 86pasene seia oo mai lava i le asō.
Ina ua fesiligia i le mataupu e pei o le ofoina o pepa matamata i taaloga a le Warriors ina a agai ane ai tagata e faatumu forms, na faaalia e le minisita sa manaomia ona faatino lea tulaga ia maua ane ai nisi foi tagata a o faaaauau ai pea ona faia taumafaiga e oo atu ai le tusigaigoa i nisi o le komiuniti e faigata tele ona oo atu iai le auaunaga.
Fai mai le minisita e itiiti le aofai o le tali ane mai tagata Maoli ma le Pasefika aemaise mai Aukilani i Saute ma o le ala lea e manatu ai e ao ona faatino soo se ituaiga auala e talafeagai e maua uma ai i latou ia ma o le asō le aso mulimuli e agai atu ai le aufaigaluega e aoina mai pepa.
Faamanatu mai ai e le Stats NZ e ono faasala oe i le 2 afe tala Niu Sila i lalo o le Data and Statistics Act pe afai sa e agavaa e faatumu le pepa o le tusigaigoa ae e te lei faatinoina.
