O le autu o le faamanatuina o le aso mo le tumamā lautele i falelēta’ua ia faanatinati ni suiga ina ia mafai ona faaleleia ai le tumamā o Samoa.

I lenei polokalame na faailoa ai e le Minisita Lagolago a le Matagaluega o Galuega Tetele a le Malo, Afioga Niuava Eti L Malolo o loo faatino pea taumafaiga a le Malo aemaise o vaega tuma’oti ma paaga e foia le tulaga o lenei faafitauli i nisi o nofoaga.

“O le autu o lene tausaga o se valaau ina ia siitia ma faanatinati galuega ma taumafaiga ina ia foia le faafituali i le soifua lelei o le atunuu e afua mai i le faaletonu o nofoagfa mo suavai ma suavai lafoai, o fausaga o tane o falelēta’ua e afea ai ma faamai pipisi.

“O le auga ma le faamoemoe ia tusa ma le taiala o le lumanai manuia o Samoa 2025- 2026 ma ia mafai ona ausia e Samoa sini lona 6 o atinae gafataulimaina a Malo Aufaatasi, ia mautinoa le maua o le suavai mamā ma le tumamā lautele mo tagata uma.

“O loo faamauina o loo iai aiga, aoga faapea ma fale o auaunaga faasoifua maloloina o loo faaletonu pea le tulaga o le tumamā lautele o loo galulue tuma’oti ina ia foia lenei faafitauli.”

Na saunoa le Minisita Lagolago e faatumauina pea le galulue soosootau’au ina ia puipui Samoa mai faamai pipisi ma ia siitia faatinoga mo suiga lelei auā le soifua manuia o tagata lautele o le atunuu.

Na tufatufaina ai nisi o faailoga mo aoga i le atunuu o loo fai ma lagolago i le Matagaluega aemaise o le vaega o loo fitoitonu ma lenei faamoemoe e unaia ai pea le tumamā e le gata i falelēta’ua ae o le siosiomaga o loo soifua ai.

O le 9 a’i lenei o tausaga o faamanatu e le atunuu lenei atinae tāua.