O le faaiuga a le World Athletics e taui i latou e faamanuiaina mai i taaloga o le Olimipeka i faailoga tupe o se faailo o le agai i luma o le taaloga ma e ono faaosofia ai foi isi taaloga ia faapea foi ona fai, o le faamatalaga lea mai le tamaitai lauiloa a Niu Sila i le togiina o le pulu mamafa, Dame Valerie Adams.
O le amataga o le masina nei na folafola ai e le faauluuluga o le World Athletics, Sebastian Coe o le a totogi e le pulega i tagata afeleti e maua pine auro le 50 afe Amerika e tusa lea ma le silia ma le 83 afe tupe Niu Sila, o se gaioiga ua faamuta ai faiga tuai na sau ai mo le silia ma le 100 tausaga o ia taaloga.
O le a maua foi faailoga tupe mo le pine siliva ma le apamemea i afeleti lava.
Fai mai Adams o se faiga lelei tele lea ma agai i luma mo taaloga ma o le tulaga tonu lea e tatau na iai mo isi foi taaloga.
Na saunoa Adams e tatau i isi totino o taaloga ona galulue malosi foi ia mafai ona faatino lea tulaga, e lē faapea e faatutusa ma le fuafuaga a le World Athletics ae talosia ia unaia ai isi pulega e saili ni sponsors ma fesoasoani ia ausia ai lea tulaga.
O le Olimipeka i Pale e amata i le aso 26 o Iulai agai i le aso 11 o Aokuso o le tausaga nei.
Puna o Faamatalaga: https://www.newshub.co.nz/home/sport/2024/04/paris-olympics-kiwi-great-dame-valerie-adams-urges-other-sports-to-follow-athletics-lead-with-olympics-prize-money.html
