O Matanonofo i Falelatai o loo iai le nofoaga o le fale lomitusi muamua na fausia ma faatūina i Samoa a le ekalesia LMS poo le Faapotopotoga Kerisiano Samoa, i le iva o tausaga talu ona taunuu le lotu LMS i le tausaga e 1830, ma o le ulua’i lotu Kerisiano foi lea i lo tatou atunuu.
O le masina fou o Aokuso e atoa iai le 192 tausaga talu ona taunuu le lotu i Samoa, ae o le Aso Toonai na te’a nei le aso 16 o Iulai na umusa ai le galuega o le maa faamanatu ua manatua ai le nofoaga na faatū ai le ulua’i fale lomitusi o le ekalesia LMS poo le Lonetona Misionare Samoa. E tusa ai ma tala faamaumau o le ekalesia LMS poo le EFKS o le fale lomitusi lea na amata ai ona lolomi faamatalaga o galuega a le lotu ma faasalalau atu i itu e fia o le atunuu, aemaise o tusi faitau.
Sa amata ai foi ona lolomi itulau o le Tusi Paia Samoa. O le tausaga e 1845 i le 15 tausaga talu ona taunuu le lotu i Samoa na siitia mai ai le fale lomitusi i Leulumoega, ma toe siitia mai ai i Malua i le nofoaga ua avea nei ma laumua o le ekalesia i le tausaga e 1848. O le sauniga na umusa ai le maa faamanatu o le nofoaga o le ulua’i fale lomitusi o le ekalesia sa auai le afioga i le Ao o le Malo ma lana masiofo, o le ta’ita’ifono o le Ekalesia Faapotopotoga Kerisiano Samoa, o le afioga i le Sui Palemia, minisita o le Kapeneta ma malo valaaulia.
