O le faamoemoe o le lotu faamanatu poo le lotu Aperila a le aiga o Sapati ma Faiane Futi o Manono sa amata i Faleu, Manono i Samoa e tuaa ia Sapati & Faiane, i le aso 10 Aperila 1912.
Ae o le tausaga 1975 i le masina lava o Aperila na faavae ai iinei i Aukilani, Niu Sila e tuaa na malaga mai ia Rev Misipati ma Faimavaiga Toso ma faatagaina ai loa ona faia iinei i Niu Sila ona o le toatele o le aiga ua nonofo ma aumau ai.
O Samoa lava e faatino ai lenei Lotu i le aso 10 o Aperila i tausaga taitasi e pei ona amata mai ai, ae o Niu Sila nei e faatinoina i le Aso Sa o loo sosoo ai ma le aso 10 o Aperila i tausaga taitasi.
Ona o galuega o loo feagai ma tagata ua tuu ai lenei lotu faamanatu e faatinoina i Aso Sa o Aperila.
O le Aso Sa ua mavae nei, 14 Aperila na toe faaauauina ai lenei lotu faamanatu a le aiga i le malumalu o le ekalesia o Faletoi Metotisi i Otara.
O le taitai o le sauniga o le Afioga le alii Sea ia Asalele Lefauaitu.
Na amata le lotu i le taeao i le 6am ma faamauina ai le anapogi a le aiga ma tatalaina ai i le 12 ona sosoo ai lea ma le toonai tele a le aiga faatasi ma le susuga i le Sea ma lona faletua e fiafia ai ma faaauau ai le mafutaga.
Na taualuga le taumafataga i faaaloaloga a le aiga mo le afioga i le Sea ia Asalele Lefauaitu ma lona faletua ia Faapaia Lefauaitu.
Ina ua mae’a ona tali le sua ma faia faaaloaloga ona tuumuli atu lea o le Faafeagaiga ma lona Faletua ae faaauau pea le mafutaga a le aiga seia mae’a i le lima i le afiafi.
O faatamā o lenei aiga i Niu Sila le Tofā Talifaaifo Salesa, Tofā Talifaaifo Luapule, ma le failautusi ia Talifaaifo Motiana Futi Ah Mann Tele’a.
