O lona suafa o Laulauga Tausaga-Collins, o se tamaitai mai tupuaga Samoa na fanau ma soifua ane i le Setete o Amerika o Hawaii, lea ua faamau ai nei i le talafaasolopito le uluai taimi ua tusia ai le igoa o le malo tele o Amerika, ua pine auro ma avea ma Siamupini i le Lalolagi i le taaloga o le togiina mamao o le maa mamafa salafalafa poo le discus.
O le mamao o le togi manumalo a Laulauga e 69.49 mita le mamao, e toetoe lava 4 mita ua sili atu ai lana togi lenei nai lo lana togi sa iai muamua.
O lea la ua faamauina ai o le uluai taimi lenei ua Siamupini ai le Iunaite Setete i lenei taaloga i le itu a tamaitai, i le togiina o le maa mamafa salafalafa, e pei ona faia ai i Budapest i Hungary i le Aso Lua talu ai le 2023 Wolrd Athletic Championships.
Na sosoo atu ia Laulauga le isi foi tamaitai Amerika i le pine siliva, le tamaitai o Valarie Allman i lana togi i le mamao e 69.23 mita, ae pine apamemea ai le tamaitai o Feng Bin.
O le tamaitai o Laulauga na fanau i le aso 22 o Me i le tausaga e 1998 (25 tausaga) i le motu o Oahu i Hawaii, ona siitia atu lea ma lona aiga i San Diego i Amerika i le 7 o ona tausaga.
O loo ta’ua i lipoti mai lenei taaloga, le faailoa o le agaga faafetai o lenei tamaitai i ona aiga, uo ma i latou uma sa tapuaia lana taaloga, aemaise ai na ia momoli faapitoa ona moomooga alofa o lona manumalo i si ona tina, fai mai Laulauga, o lona tina na sili ona uunaia malosi o ia i taaloga.
O le fiafiaga sili o Laulauga o le fia nofo i le fale ma faitau ana tusi, peitai e lei malie ai le loto o si ona tina.
Fai mai si ona tina, ‘Leai….o oe o se teine aumalosi, tu i luga e alu e fai se isi mea e faaaogā lelei iai lou tino malosi lena.’
Ona amata lea ona agai Laulauga i le taaloga volipolo, ae lei matuā atoa i ai lona fiafia.
Sosoo ai ma le taaloga pasiketipolo, ae o le lave e lē lava lona saoasaoa e faatino ai lea taaloga.
Na amata loa ona agai Laulauga e togi le pulu mamafa a o iai i aoga maualuluga, ma o inā na amata ai ona tulai mai lenei tamaitai ma maua ai loa lona avanoa e agai atu i le kolisi i le Iowa.
O le kolisi i Iowa lea na aoga ai Laulauga, ma amata a’oa’o ai loa i le togiina o le maa mamafa salafalafa, lea la ua oo ai lava ina ausia le suegasiamupini i Budapest ma ‘ula ai loa i lenei vaiaso i le pine auro.
