O le vaiaso ua mavae na uluai usuia ai le fonotaga muamua a uluaoga ma faiaoga o loo auai i totonu o le faalapotopotoga o le Fagasa i Aukilani. 

E 16 aoga sa auai puleaoga ma faiaoga e aofia ai Sir Edmund Hillary School, MEPS School, Homai School, Rowandale School, Wiri Central School, Sutton Park School, Robertson Road School, Otahuhu Primary School, Ferguson Intermediate School, Nga Iwi School, Rowandale School, Rosebank School, Finlayson Park School, Robertson Road School, Roscommon Road Sch, Kelston Intermediate School. 

E itiiti nai aoga e lei auai i lea fonotaga ona o tuatuagia sa iai. 

O le faamoemoe maualuga o lenei fonotaga o le talanoaina lea o le agai i luma o le Sosaiete a faiaoga Samoa o loo i Aukilani. 

E faasoa faatasi ai faiaoga Samoa uma o ē o loo aoaoina le Gagana Samoa i Aotearoa nei, faapea ma faiaoga o ē na fananau i NZ, ma e lē lelei le gagana Samoa. 

O le mafutaga lea e maua ai le loto toa o fanau na fananau i NZ, ina ia aua ne’i fefefe e tautatala, i le gagana, ma ia latou iloa, tu ma aga a Samoa ma lona faasinomaga. 

E fiafia e mafuta i le Sosaiete, auā e aoao mai ai i ē na mua i malae i le galuega ma solisolimulivae ia latou foi galuega lelei ua faia.  

O lenei mafutaga, e aofia ai ma faiaoga fesoasoani, o loo lagolagosua i le galuega a faiaoga. 

E tusa ma le 100 sui o le Fagasa a Aukilani ua iai i le taimi nei. 

Ae o le isi vaega tāua mo fanau ma mātua o le Gagana. 

O le matimatiina o fanau ina ia tumau ma mauaa i la latou gagana. 

O le faaaogāina o le gagana i totonu o aoga, e faaolaolaina ma faatumauina ai le fiafia o fanau e aoao, ae aua le vaai maualalo i lo latou tofi mai le Atua. 

Ia faaauau pea auā o lo latou faasinomaga lea. 

Ua tele matagaluega o loo moomia tagata e lua gagana ina ia mafai ona faaliliuina upu ma faafaigofie le matafaioi e fesoasoani ai mo isi. Ia iloa e fanau, o le tamaititi e lua ana gagana, o le tamaititi poto lea ma atamai, e ala i suesuega a le au popoto i le lalolagi. 

E tāua foi le lagolago a mātua ina ia aua le vaivai e aoao fanau, e ala lea i le tautatala iai, faitautusi iai, pese iai, siva iai, ma ia fesootai vavalalata i le gagana i taimi uma. 

Ia ave i le aoga Aso Sa ma le lotu, faaaogā faletusi ma polokalame fesoasoani a le malo o loo aumai i aulotu e pei o le Reading together ma le Talanoa Ako. 

O le tele o le tautala faasamoa i fanau, o le a tupu tele ai le fiafia o fanau e fesootai ma e lē toe fefefe foi e faaaogā le gagana i taimi uma. 

E aveese ai foi le manatu o mātua (mindset), faapea o le aoaoina o le Gagana Samoa e lē maua ai se galuega. 

Ua na o le faaperetania e maua ai galuega i totonu o Aotearoa nei. 

Ia faailoa foi i mātua, o le tamaititi e lua gagana, o le tamaititi atamai lea, auā e mafai ona faasamoa atu ma tali mai i le faaperetania, faaperetania atu ma tali mai i le faasamoa.