Ua lipotia e le BBC le faamatalaga mai Ukraine ua iai nei se maliega ua taunuu iai talanoaga ma Amerika e uiga i le Peace Plan ua faailoa ane mo le faamuta ai loa o le taua ma Lusia.
Pei ona faailoa atu muamua i talafou e 28 ni vaega o loo aofia i lea fuafuaga a Amerika ma na tuuina ia Ukraine i le vaiaso talu ai ina ia galulue ma silasila iai ma tuuina ane ai sa latou tali a o le’i oo i le aso a taeao.
Peita’i la o lea e foliga ua taunuu i se maliega auā sa faailoa foi e Trump i sana tusitusiga i le social media o le fuafuaga autū sa faailoa ia Ukraine ua mae’a teuteuina i sao o itu uma e lua.
Ta’ua e Trump ua ia faatonu le sui faapitoa o Amerika, Steve Witkoff ia feiloa’i ma Putin i Moscow ae feiloa’i le failautusi o le ami a Amerika, Dan Driscoll ma sui mai Ukraine.
Ua ta’ua i le lipoti a le BBC se faamatalaga mai le ta’ita’i o Farani Emmanuel Macron e lē o vaai atu lava i se naunauta’iga o Lusia e faamuta le taua ma e tau faapea foi finagalo o isi ta’ita’i o Europa e uiga i lenei matāupu.
Puna o Faamatalaga: https://www.bbc.com/news/articles/cy95jvw57v2o
