A o feagai ai le lalolagi atoa ma le tulaga faaletonu i le tau siitia ua iai nei le suāuu ma le penisini, ua amata foi ona iai se isi gaioiga faasolitulafono ua amata ona faateteleina i totonu lava o le atunuu, i le taumafai ai o nisi tagata e ‘alofia le totogia o le utuina o latou penisini i pamu penisini.
O loo talanoa atu le Motor Trade Association poo le MTA i ona sui e faatatau i le tula’i mai o le faateteleina o le tulaga ua iai nisi tagata e aga’i i pamu penisini mo le utuina o latou taavale, ae mulimuli ane ua sosola ae lē totogia.
E pei ona ua mae’a ona faailoa mai e le malo, o loo lava mo le taimi nei sapalai o le suāuu ma e lē tatau ona taumafai fua tagata e utu ma faatutumu ni latou lava sapalai o le penisini.
Ta’ua e le sooupu a le MTA, Simon Bradwell, e ui e lē o se mea fou le taumafai o nisi tagata e ‘alofia le totogia o latou penisini pe a utu taavale, peitai e ono faateteleina lea iuga faasolitulafono ona o taimi faigatā tau seleni ua iai nei.
Ua amata ona lagonaina e aiga le faigatā o le utiuti o le faasoa ma ua tau lē lava se tupe sefe e faatau uma ai mea mana’omia mo le tausiga o le aiga.
O tulaga la faapea ua amata ai ona filifili nisi tagata, poo le faatau o mea manaomia mo le tausiga o aiga e pei o taumafa, pe totogi le penisini mo feoa’iga i le taavale, ae lē o lea, ua aapa loa i le faiga lea o le utu o taavale ma sosola ese ae lē totogia le penisini.
Fai mai Bradwell, tau ina ia manatua e tagata, o le aufaigaluega a pamu penisini, e lē o latou e tuua’ia i le taugatā ua iai nei le tau o le penisini; o loo faatino foi a latou galuega.
Ta’ua foi e le pule o le Māngere Budgeting Services Trust, o Lara Dolan, ua iai tagata ua matuā lē toe gafatia ai le siitaga ua iai nei le penisini.
O tau faaopoopo ua iai nei mo le penisini ua faaopoopo atili ai isi mafatiaga i aiga ua leva lava ona mafatia i le taugatā o le soifuaga.
O le talotaloga e talosia ia lē faaumiumi ai pea nei fetaua’iga o loo faia i atunuu o loo maua ma gaosi mai ai le suāuu, auā ua matuā vaaia lava le āfaina ai o tagata uma i lenei taimi.
Puna o Faamatalaga: https://www.1news.co.nz/2026/03/28/drive-off-thefts-a-concern-as-people-struggle-with-fuel-costs/
