O le taunuuga lea o le palota faalilolilo na saili ai finagalo lagolago ma finagalo tetee o sui faipule o le Palemene, i le fautuaga a le Komiti o tulaga aloaia ma amio taualoa e toe faaauau ai ona faamalolo le tumau le sui faipule o Lepa ma Faleata 3 mo le umi e 24 masina poo le lua tausaga.
O le faaiuga foi lea o felafolafoaiga i le lipoti a le komiti na toe silasila ai i le latou faaiuga muamua lea na lu’i i le faamasinoga e le susuga Tuilaepa L Sailele Malielegaoi ma le tofa Lealailepule Rimoni Aiafi, ma faamuta ai e le faamasinoga le faamaloloina le tumau o ia sui mamalu, ae toe foi i le Palemene mo se isi iloiloga ina ia faamalieina aia tatau o sui faipule e toalua ua le maua so la avanoa e faaali ai ni finagalo i le faasalaga na faia muamua e le komiti.
Na saunoa le taitai o le Itu agai le sui faipule o Lepa ma le sui faipule o Faleata 3 a o lei faia saunoaga faalauaitele i le lipoti a le komiti.
I le saunoaga a le taitai o le Malo le afioga i le tamaitai Palemia na ia faamamafa ai le tāua o le tutusa o tagata uma i le tulafono.
O le afioga i le sui Palemia, afioga Tuala Tevaga Iosefo Ponifasio na faauluina le faasea faasaga i le faipule o Lepa ma Faleata 3, na maua foi lona avanoa e saunoa ai i le lipoti ma le fautuaga a le komiti, ao lei faia le palota faalilolilo na saili ai le finagalo o le Palemene.
O aiaiga o le faasalaga o le taitai o le Itu agai ma le sui faipule o Faleata 3, o le lē maua o ni totogi ma ni alauni, tapu ona toe ulufale i le lotoa ma le maota fono o le Palemene, ma ua faamalolo foi o la tiute faafaipule mai le toe auai i fonotaga faapea fono a komiti o le Palemene o loo avea ai ma sui.
O le masina o Oketopa o le tausaga e 2024 e mae’a ai le faasalaga 2 tausaga o le faamalolo le tumau o ia sui usufono o le Fono Aoao Faitulafono o le paeaiga lona 17 a le Palemene.
