Fai mai le au faasalalau lakapi i le taaloga mataina o le semifinal ua manumalo ai nei Samoa, “Ua tata’e e le Toa Samoa le fatu o Egelani”.
O le taamilosaga o le Ipu a le lalolagi o le lakapi liki i lenei tausaga, o loo faagasolo i laufanua o Egelani, ma sa faamaualuluga uma tagata Egelani, e tatau ona manumalo le latou ‘au i le Ipu lenei o le lalolagi, ona o mafuaaga nei:
- O Egelani o se tasi o ‘au malosi o le ituaiga lakapi lea, ma e aofia i ‘au o le Vaega Muamua poo le Tier One, lea e aofia ai ma Niu Sila ma Ausetalia
- O loo faia taaloga i laueleele o Egelani ma e telē le fesoasoani o le tapuaiga mau a le atunuu atoa o le a faatupu malosi i le latou ‘au.
- Ua uma ona taaalo muamua Egelani ma le Toa Samoa i taaloga amata o lenei taamilosaga, ma na telē se manu’aga na tuu ai e Egelani le Toa Samoa ina ua manumalo i ‘ai e 60 i le 6 a le Toa Samoa, le taaloga lea i St James’ Park
- Ua uma ona faatulaga e i latou o loo faamaopoopoina nei taaloga, a mamao se alu a le Toa Samoa i lenei taamilosaga, pe na o taaloga lava e saili ai ni ‘au mo quarterfinals, ona latou muai totogi ai lea o pasese o le Toa Samoa ma faatulaga le aso e toe oese ai mai Egelani.
O nei vaega uma sa telē se faamautinoaga ia Egelani, e latou te toe faaluaina lo latou manumalo i le Toa Samoa ina ua iu ane o le a taaalo i le semifinal. Peitai ua lē o lea le iuga o le taaloga i le po anapo, ma ua matuā tata’e ai ma nutimomoia e le Toa a Samoa fatu o Egelani ma lana ‘au malosi.
Mo le tapuaiga a Samoa, sa taputapuai e pei o le tapuai a le Feepo. E tele manatu sa fetusiai ai lagona i luga o upega tafailagi, ma o le tele o na manatu, sa faaleo lava le mitamita i taumafaiga a le Toa Samoa, aemaise lava ina ua faia’ina ai le ‘au malosi a Tonga ma sao ai loa i le semifinal ma Egelani.
Peitai o nisi o na feau faamalosi, na peiseai ua latou iloa e faigata ona faatoilalo e le Toa le ‘au a Egelani, ona latou faapea ai lea, pe malo pe faia’ina le Toa ia Egelani, ua lava ma totoe lea mo latou, ina ua mitamita i le manumalo ia Tonga. Pe atonu ona o le mamao o le malo o Egelani i le la uluai taaloga ma le Toa, na mafua ai ona le faitaulia se saofagā atu o le Toa i le sailiga siamupini.
Nei la ua toe feliua’i uma e tama o le Toa lena masalosaloga, ina ua latou tutu’i ma tata’e ai le fatu o Egelani, i ‘ai manumalo e 27 i le 26 a Egelani.
