I le te’a ai o le itula e tasi i le vaveao nei na maua mai ai le lipoti lata mai a le Matagaluega o le Soifua Maloloina i tulaga ua iai aafiaga o le Koviti i Samoa ma faamaonia mai ai le faaopoopo o le toatasi ua maumau le soifua i le Koviti-19.
Ua siitia ai nei le fainumera o i latou ua maliliu i le to’atolu. Ua matauina o i latou uma ua maumau soifua e mai le 60-80 le matutua o le soifua.
Ua ripotia mai e le Matagaluega o le Soifua Maloloina o lē ua maliu o se tamā ua 87 tausaga o le soifua, e leai ni gasegase tūgā tumau a lea tamā ma e le’i faia ona tui puipui o le Koviti – 19.
Ua fa’amaonia mai foi e le Matāgaluega le a’afia ai oi latou fou e to’a 275 mai le mamalu lautele o le atunu’u ma ua si’itia nei i le to’a 2,997 i latou ua a’afia talu ona sao i tua le fa’ama’i i le Aso 17 Mati 2022.
I totonu o le atunuu e 1583 i latou o lo’o a’afia pea i le siama i le taimi nei poo active cases o lona uiga e silia ma le to’a 1000 ua manuia. O le to’a 12 o i latou ua pesia o lo’o taofia nei i le Falema’i i Moto’otua. Ma o se taimi muamua lea ua fa’amauina e to’atolu o lo’o i le potu tigāina i le falemai (ICU), tusa ai ma fa’amaumauga a le Matāgaluega o le Soifua Mālōlōina.
