O le 7 aso ua tuanai talu mai le Aso 17 o Aperila e oo mai i le Aso Sa mulimuli o lenei masina le Aso 24 e toatolu tagata ua maliliu i le faama’i koviti-19.
E le’o faailoaina i le ripoti a lata mai a le Soifua Maloloina poo le a le matutua o i latou ua maliliu ae ua faamauina ai nei ua to’a 16 tagata i Samoa ua fano soifua i le faama’i. O le 7 foi aso lea na faamauina ai le aofaiga o e ua aafia i le siama o le Koviti-19 i le to’a 2214 ma oo ai le numera o tagata lautele o le atunuu ua aafia i le aofaiga e to’a 8,280.
E mafuli lava le toatele o i latou ua maua i a latou suega ua aafia i le siama i le motu o Upolu e to’a 7,536, o Savaii ua faamauina e to’a 736 i latou ua aafia ma le motu o Manono Tai ua to’a 8 ua maua i le siama.
E to’a 20 gasegase o le faamai o loo i nofoaga faapitoa i le maota gasegase i Motootua ae to’a fa o loo taofia i potu mo gasegase tigaiga.
E le’o mapu le fagufagu ma le fa’amanatu a le Matagaluega i le mamalu lautele o le atunu’u ina ia tausisia puipuiga uma mai le Matāgaluega ia faia tali fofoga, tausisia le va ma le isi tagata (social distancing) ma ia tautuanā le nonofo lelei i aiga ma ia fa’anofoesea i se vaega fa’apitoa o fale pe a masalomia ua e a’afia i āuga o le siama se’ia mautinoa ua toe malosi ma malu puipuia mai le fa’ama’i. E fautuaina fo’i le mamalu o le atunu’u ina ia faia tui puipui o le Koviti – 19 auā lava le tete’e atu i le fa’ama’i mo le saogālēmu o Samoa atoa.
