Ua moomia se national standard na te taialaina ma laugatasia ai galuega I uafu I totonu o Niu Sila
O le finagalo lea o Craig Harrison o le failautusi aoao a le Maritime Union a Niu Sila ao faaopoopo pea tagata faigaluega maliliu I le uafu I Aukilani
Taeao ananafi sau ai le tala faanoanoa o le pau o se tasi e gafa ma le utaina o vaa I le uafu I Aukilani, ma I saunoaga a le failautusi i tala a le Newshub na pau mai se tasi o nofoaga maualuga e le I faamautinoa mai poo le a le maualuga ma o lea na pau I luga o le vaa
Na maliu ai lava ma lea tagata faigaluega I le uafu ma o se tasi o loo galue faakonekarate I le uafu I lalo o pulega a le Wallace Investments Limited
Ao faaauau ai suesuega masani mai le iuni na toe faaleo ai foi le tulaga o itula uumi o loo galulue ai nisi o le aufaigaluega lea e oo atu I le 70 itula I le vaiaso aemaise o le naunau ia faia le galuega ona o le tele o le manao ae faatuatuanai ai le saogalemu
Talitonu ai le Craig o le tulaga lea o loo misi o se tulaga faatonutonu e laugatasia ai le faatautaiga o galuega a uafu ma I lona taofi ua moomia ai le fesoasoani a le malo
O le tausaga talu ai na maua ai I suesuega le le faamuamua o le saogalemu o tagata faigaluega I le uafu I Aukilani ao naunau ai e faia le galuega, ma o le maliu o le tagata faigaluega ananafi o le toafa ai ia o tagata maliliu I le uafu I Aukilani talu mai le 2017
