Ua faailoa e le Pulega o le nofoaga mo suesuega faasaienisi o le SROS i Nafanua ua lava tapena le auaunaga faasaienisi e suesue tulaga o vairusi poo variant eseese o le Koviti e aafia ai soo se tasi i totonu o le atunuu mai loo le tauave o suega poo test i Niu Sila.
O le laa lea a lea Pulega a le Mālō ona o le taligā o le faaiuga o suega pe a auina atu i Niu Sila aemaise o suega poo tests o tagata o le pasese mai Brisbane i Ausetalia lea na faaoo atu i Aotearoa mo nisi sailiiliga ma aumai le faaiuga o nisi ua aafia i le variant o le omicron ma le toatasi ua aafia i le delta.
Ua faailoa foi lea tulaga i le nofoaga ona o le tele o faafesili ua taunuu iai ua fia maua ai se faamaninoga o le latou auaunaga. Faaalia e le Pulega i se pepa o faalauiloa i le atunuu ua iai nisi o masini ma mea faigaluega ua o latou faaogaina e faia ai ia suesuega o le faama’i koviti19.
O ia masini ma mea faigaluega na fesoasoani iai nisi o paaga faavaomalo e pei o le UNDP, o le UNICEF ma le FAO. O le fonotaga a le Palemene i se vaiaso ua tuanai na faailoa ai e le Minisita o Faatoaga ma Faigafaiva, le Esetete Tausi ma le SROS ua ave lana fautuaga i le Pulega o le nofoaga e silasila ini auala e mafai ai ona o latou faatino suesuega o le faama’i e aunoa ma le auina atu i atunuu i fafo.
O lea la ua faailoa e le Pulega o le SROS ua mafai ona o latou faatinoina lea galuega. Ua o latou faaalia foi nisi o tagata suesue saienitisi ua latou umia agavaa ma tomai aoaoina o loo galulue ai i le nofoaga ma o alo foi ma tama fanau o le atunuu ua iai faailoga maualuluga o tulaga o suesuega faasaienitisi.
Ua taua mai foi e le SROS o loo iai fuafuaga a le Pulega mo masini e faia ai suesuega e vailiili ai (identify) soo se vairusi e pei o le Koviti e ono alia’e mai poo le Genomic sequencing.
Ua tele ina faaaoga e atunuu o le lalolagi lea auala e saili ma faamanino ai ituaiga siama, e pei o le Delta poo le Omicron ma vave faatonu ai faaiuga fai a Soifua Maloloina talu ona amata mai le pepesi o le Koviti, ma o le ā telē se aoga mo Samoa i le maua ai o faamaumauga i se taimi vave pe a tulai mai nisi tagata aafia i le atunuu.
