Ua faamaonia mai i lipoti ma faasalalauga le lē faataunuuina ai o se tasi o koneseti i Niu Sila o le One Love lea na fuafua mo le tausaga fou.
Faaalia i se pepa o faamatalaga, ua taunuu le pulega ma le komiti e faafoea le koneseti ona o ni aafiaga ma nisi o faafitauli o loo fetaia’i nei ma i latou i le tau tuufaatasia ai o le fiafia tele.
O nisi o faafitauli e aofia ai tulaga pagatia o loo iai le alualu pea i luga o le tau o le soifuaga ua iai nei, o le faigatā i tagata ona faatupe malaga e aga’i mai ai e auai i le koneseti faatasi ai ma faafitauli tau i le pulega ma le faatonu sa iai o le One Love.
Ma ona o lea tulaga ua faamālūlū mai ai le komiti ma i latou o loo nafa ma tapenaga i ana paaga uma e tusa ai ma lea fuafuaga.
O loo iai le naunauta’iga e sau se taimi o i luma ona toe faailoa mai lea o se isi tapenaga o lea koneseti.
Mo le silafia o le One Love o se koneseti i le ituaiga musika o le raggae, ma ua 11 tausaga tatalu ona faatino mai, ma e faatino lava i Tauranga i tausaga ta’itasi.
