O le vaiaso lenei na folasia ai i le Faamasinoga Maualuga le toe tolopo ai o le suesueina o moliaga a le alii o Samuelu, o lona toalua o Sivai, o le alii faipule ia Fepulea’i Faimata Su’a, o Li’o Faataumalama ma Lise Marie Schmidt mo le tausaga fou, ina ua talia e le Faamasinoga Maualuga le apili a i latou nei e ala ia latou loia.  

Ma o lea faai’uga ua faaalia ai atugaluga o le alii faipule o le itumalo o Faleata 3, Lealailepule Rimoni Aiafi, e pei ona ta’ua i sana faatalatalanoaga ma le aufaasalalau lona faanoanoa tele i le faai’uga a le faamasinoga.  

Ua fesiligia e le alii faipule le faai’uga a le faamasinoga i le itu o aiātatau.  

Faamanino e Lealailepule Rimoni Aiafi ona faanaunauga ina ia faatino loa lenei faamasinoga peitai ua lē faataunuuina.

E ui i le talia ai e le Faamasinoga Maualuga o le talosaga apili a i latou nei o loo molia ina ia tolopo le suesueina o le mataupu o loo tuua’ia ai, ae o le mea mautinoa o le a faaauau pea ona faia e le tamaitai faamasino sinia ia Talasa Atoa Saaga le iloiloina ma le suesueina o lea lava mataupu.  

Mo le silafia o le aso 26 o Aokuso o le tausaga nei na faamaonia mai ai e le Faamasinoga Faaitumalo e ala i le tamaitai faamasino ia Talasa le suesueina o le mataupu e pei ona tuua’ia ma molia ai Samuelu, o Sivai, o le alii faipule ia Fepulea’i Faimata Su’a, o Li’o Faataumalama ma Lise Marie Schmidt, i le faia o faamatalaga taufaasese, faia o faamatalaga taufaaleaga, ma le taumafai e natia le amiotonu, ae peitai o lea ua tolopo mo le tausaga fou.

O moliaga nei e afua mai i suesuega o le maliu o le alii talavou o Tuuau i se faalavelave tau taavale i Vaitele uta.

O se taimi o i luma o le a toe valaau ai i luma o le tamaitai faamasino sinia o le Faamasinoga Faaitumalo moliaga o i latou nei ua molia, e toe sailia ai se isi taimi ma se aso talafeagai e valaau ai molimau.