O lea ua tuuina atu e le afioga i le Faamasino Sili Satiu Simativa Perese i le Fofoga Fetalai le maliliega na taunuu iai lē na faaulu le tagi tau palota mai le Itumalo Safata No.2 le susuga Laumatiamanu Mathew Ringo Purcell ma lē na faasaga iai moliaga o le sui na manumalo i le palota tele ia Aperila le afioga ia Nonu Te’o Lomialagi Lose Niumata.
O nisi o aiaiga o lea maliega ina ia toe ave i tua le tagi ae faamavae lē na manumalo ae toe tauvā uma i laua i le palota laititi a Safata No.2.
Ae o se toe teuteuina o le faaiuga ua maea ona fofogaina e le faamasinoga ua faailoa mai ai o le tuuina atu i le Fofoga Fetalai o lea vaega o le maliega mo sona finagalo ina ua silasila poo iai ni auala faatauvalea poo le corruption i lea maliega. O lona uiga o le Fofoga Fetalai o le a iai le faaiuga o lea tulaga.
I le tautoga la ua toe iai le teuteuga e pei ona faailoa mai e le Ofisa o le Faamasinoga o le manino mai lea pe afai o se faaiuga a le fofoga o le fono ua aafia ni faiga faatauvalea e lē mafai la ona tauva uma i laua.
Ae agai e talia e le Fofoga Fetalai lea vaega o le maliega e toe faaui ai tua le mataupu o le a mafai lava ona tauva uma Laumatiamanu Mathew Ringo Purcell lea na tauva i lalo o le faamalu a le FAST ma None Te’o Lomialagi Lose Niumata o le sui a le HRPP.
O le pepa aloaia o le taunuuga o tagi uma e 28 o le faigapalota i le masina o Aperila na faailoa mai ai o lē na faasaga iai tuuaiga a le itu tagi e le’o toe iai sona faamoemoe e tauva i le palota laititi peitai o le teuteuga ua toe aumai e le faamasinoga ua faailoa ai le tuuina atu o le tulaga lea i se finagalo o le Fofoga Fetalai.
