I se ripoti lata mai a le Matagaluega o le Soifua Maloloina ua faamauina ai le faaopopo o le to’a 263 fou o i latou mai le mamalu o le atunuu ua maua i le siama o le Koviti-19.
Ua oo atu ai nei le aofai o i latou ua aafia i le to’a 3,260 talu ona oo i tua le faama’i mai le Aso 17 o Mati o le tausaga nei peitai e na’o le to’a 1,712 i latou o loo aafia pea poo active cases.
O loo maualuga pea le pasene o i latou ua aafia o loo alala ma nonofo i le motu i Upolu lea ua lipotia mai e oo atu i le 96% ae mo le motu tele i Salafai e 4%. Tumau pea le saogalemu o motu e lua o Apolima Tai ma Manono Tai e leai se tasi ua aafia i le faama’i.
Ua lipoti mai foi le tumau o tagata maliliu i le to’atolu talu ona lipotia mai le maliu ai o se tamā 87 tausaga le matua i le aso ananafi. E to’a 9 o loo taofia nei i le maota gasegase i Motootua.
