O le fale komiti o le nuu o Asaga i Savaii o loo tapuvae tasi iai i le vaiaso nei se faatasiga a fanau a aoga tulagalua e 6 o le itumalo o Faasaleleaga 4 ma Faasaleleaga 5.
O le autu o le auai i se aoaoga ua tuusa’o ai i mafaufau o fanau le tāua o le puipuia lelei o le siosiomaga faalenatura e pei o le sami ma meaola o nonofo ai, aemaise o le tāua o le latou iloa o le faasao ma puipui lelei amu o le sami o le olataga o i’a ma figota.
O se taumafaiga lenei ua faaalia e se sui sooupu o le aoaoga le afioga Matai’a Ueta Jr Faasili, ua mafai ona faatino ina ua fausia se maliega o matagaluega a le Malo e pei o le vaega o faatoaga ma faigafaiva, puna’oa faalenatura ma le siosiomaga ma le matagaluega o aoga taaloga ma aganuu.
Le sooupu o le aoaoga o le Guardian e faapitoa i mataupu o le puipuia o le siosiomaga le afioga Mataia Ueta Jr Faasili.
O fanau mai vasega fitu o aoga tulagalua i Pu’apu’a, Saasaai, Lano, Faga, Saipipi ma Asaga o loo auai i le aoaoga.
O loo faamoemoe e see atu le aoaoga i aoga tulagalua i itumalo o Palauli ma Satupaitea pe a tuanai le vaiaso fou.
