O le Afioga ia Adrianus M.M van der Vorst o le Amepasa lea o le Malo o Netherlands i Samoa nei lea na tuuina aloaia ana tusi taualoa i le taeao nei e aloaia ai lona tofiga i le atunuu.
I pepa o faamatalaga mai le Ofisa o le Sooupu a le Malo, o le Afioga i le Sui o le Fono a Sui Tofia, Le Mamea Tuiletufuga Ropati Mualia, na ia tauaaoina tusi taualoa a le Amepasa ia Adrianus i le Ofisa a le Matagaluega o le Va-i-fafo.
Ua silia ma le 40 tausaga talu ona faavaeina mai faigapaaga a Malo e lua ma o nisi o mataupu o loo iai le vaai taulai e aofia ai le puipuiga o tagata mai faalavelave faalenatura, siisii o le suasami, malosiaga faafouina, suiga o le tau, suavai mamā, ogasami ma nisi o atinae faaauau.
O nei mataupu o loo galulue faatasi ai le Malo o Samoa ma Netherlands faatasi ai ma Malo Aufaatasi ina ia mautinoa o loo soliga lelei pea taumafaiga auā le lumanai manuia o tagata lautele.
O le soifua aoaoina ma le soifua galue o lenei tamalii e pei ona iai ana aoaoga i nisi o Iunivesite o loo ia umia ai nisi o faailoga maualuluga i vaega tau i le va-i-fafo.
Na amata galue i le Matagaluega o le Va-i-fafo i Netherlands i le tausaga 1997 ma umia ai nisi o tofiga i le Malo.
Ua tele nisi o atunuu na galue ai e ala lava i le auaunaga faavaomalo e aofia ai Amerika, Nigeria ma nisi o vaega o Europa.
O Niu Sila o le a faamautu ai Adrianus i le ofisa tutotonu a lona Malo ma faatino ai lana auaunaga mo Samoa.
