Ua faalauiloa mai le iuga o suesuega a le coroner i le faalavelave na maliliu ai alii e toalua i Dunedin ina ua fetoai le taavale na malaga atu ai ma se loli lapisi i le masina o Iulai 2020.
Ua lipotia e le Stuff o le avetaavale o Josiah Mani 24 tausaga ma le pasese o William Matthew Joseph Quin na maliliu uma i lea faalavelave ae o loo ta’ua i le lipoti o Quin e mai Kalaiesetete ma sa aoga i le Iunivesite o Otago a o Mani, mai Papua Niu Kini sa aoga i le Otago Polytechnic ma sa faigaluega uma i le Mainland Poultry i le itu i Matu o Dunedin.
O le faaiuga a le pathologist i le mataupu lea ua ta’ua ai e foliga sa ogaoga manu’aga i le ulu o Mani ae sa malosi foi le faasuaava ma lē mafai ai ona agai ese ma le taavale ma maliu ai ina ua mānavaina le asu i le taimi na mu ai le taavale.
O William Quin foi na maliu ona o aafiaga ogaoga i lona fai’ai tulou.
Fai mai la le coroner na mafua le laveaga ina ua kolosi le taavale na malaga atu ai i le vaega tonu o loo alu ane ai le loli ona ua ova le faasuaava.
