O le lona tolu ai nei o aso talu ona faimalaga mai le Miss Global ia Shane Quintana Tormes i Samoa nei ma o se tasi lenei o nofoaga na momoo e fia asia o le Sosaiete a le Kanesa i Samoa i Motootua.
O le auga ma le faamoemoe o lona asia o lenei nofoaga ona e iai lona sootaga i le tulaga o lenei faama’i sa aafia ai lona tina ma maliu ai a o tapena ai mo le sailiga tausala a le Miss Global i le tausaga ua mavae.
O lana faasoa i lona iloa a o feagai ai si ona tuaa ma lenei faama’i o le lagolago lava le tulaga manaomia e lē o loo aafia.
“O a’u o le ulumatua ma o se tulaga ootia le vaai atu o tauivi lona tina ma lenei faama’i sa ou suesueina poo le ā se auala ae o se mea e ao ina ou faia e lagolago ai si o’u tina.
“I la’u lava mau o le faama’i lenei o le kanesa e aafia uma ai lava le aiga atoa e tusa pe toatasi le tagata o loo aafia e aafia uma ai lava le aiga lea, o le uiga o lea faamatalaga e aafia o tatou lagona o mafaufauga ua oo lava i le tamaoaiga e aafia foi.
“E ese ma le taugata o le togafiti o lenei faama’i ae o le tulaga e manaomia e lē ua maua i lenei faama’i o le lagolago malosi a tatou o tatou aiga uo ma isi tagata e faamalosiau foi a o feagai ai ma tiga auā tatou te lē silafia le mamafa o le avega o loo tauaveina e i latou ua maua i lenei faama’i.”
Na faaalia foi le faafetai a le Pule Sili a le Sosaiete ia Papalii Su’a John Ryan i le amanaia e lenei tamaitai ma maua lona avanoa e asia ai le nofoaga aemaise o se fesoasoani ua tauaaoina auā galuega faatino a le sosaiete.
“Faafetai lava e ui ina tele le pisi o polokalame ae ua faaavanoaina mai lou taimi e faasoa atu faasoa mai foi nisi o saunoaga faamalosiau ia i matou ma la matou tautua e ala lea i le tuuina atu o fesoasoani mo i latou ua aafia i le kanesa.”
O galuega faatino a le sosaiete a le kanesa o loo tautua ai le mamalu o le atunuu aemaise ia i latou o loo ua aafia i lenei faama’i i vaega e mafai e le sosaiete ona tuuina atu iai le fesoasoani.
E pei ona ta’ua e Papalii e ui e lē o se galuega faigofie ae o le tatalo lava ma le faamoemoe i le Atua e foaiina mai le malosi e faatino ai auaunaga e ala i manulauti ma polokalame faataatitia e utagia ai e le atunuu tulaga e aafia ai le soifua i lenei faama’i.
