O le taeao nei lea na tuuina ai le fesoasoani a le Malo o Isaraelu faatasi ai ma se faalapotopotoga ua ta’ua o le Reagan Milstein Foundation mo le Aoga Tulagalua a Moataa.

O lenei fesoasoani e aofia ai ni mea taalo e faaaogaina i le taaloga o le soka faatasi ma nisi o meaaoga e faaaogaina e le fanau.

Na saunoa le Afioga i le Amepasa o le Malo o Isaraelu, Ran Yaakoby o lenei fesoasoani o se galuega muamua lea ua faatinoina talu ona avea ma Amepasa i Samoa.

“Ua lua ai nei aso talu ona ou umia le tofi Amepasa o Isaraelu i Samoa ae o se galuega faatino muamua lea ua ou faia talu ona umia lenei tofi i totonu o le atunuu.

“A o lei faimalaga mai i Samoa sa iai sa’u uo lelei lava sa ia manao e aumai se fesoasoani ona ou fai lea iai e aumai lana meaalofa ou te sau e aumai i Samoa i le tou aoga e manatua ai pea se tasi o ona atalii e fiafia i le taaloga soka ua maliu faapea ai nisi o fanau.”

“Ou te talitonu o lenei fesoasoani o le a faaaoga ma le tatau e alo ma fanau e le gata e atiina’e ai le taaloga soka aemaise ai foi le faatumauina pea o le sootaga vavalalata a Malo e lua.”

Na momoli ai foi le faafetai a le Peresitene e fai ma sui o le aoga ma le afioaga, Afioga Tofaeono Fonoti Dr. Lafitai Iupati Fuatai i le Malo o Isaraelu.

“E faafetaia tele lava le Malo o Isaraelu aemaise le faalapotopotoga sa galulue i le tuuina mai o lenei fesoasoani, o le naunautaiga lava ia aoga i le fanau lenei meaalofa i le itu tau taaloga.”