E tele setete o Ausetalia ua tuuina a latou faamanatu e faatatau i le misela ina ua lipotia se alii mai Jakarta na faimalaga mai i Ausetalia a o aafia i le misela.

O le soifua maloloina i Kuiniselani na o latou faailoa o le tagata lea e lei iloa o loo aafia ina ua malaga atu i Brisbane e ui ane i Melepone i le aso 3 o Iulai. 

Fai mai leoleo na taunuu le alii lea i le malaevaalele i Melepone a o lei agai atu i Brisbane i se malaga a le Qantas i Brisbane.

Ua fautuaina tagata sa faimalaga i le aso lea i le malaevaalele i Melepone ma Brisbane ina ia siaki mo ni āuga.

Sa afea foi e lea tagata nisi nofoaga a o iai i Brisbane. 

O āuga o le misela e amata lava i le faalogoina o āuga e pei o le fulū, tafe le isu tulou, mu mata ma tale ae sosoo ane ai ma le fiva ma le mageso.

E vave ona pepesi i le pa’itino aemaise lava i tagata e le o faia uma tuipuipui.