Ua tuuina atu nei i le Palemene le lipoti lona valu e faatatau i le tulaga o loo iai aafiaga o aiātatau o tagata i lo tatou atunuu.
O se galuega o loo aiaia faaletulafono e tatau i le Komesina o Sulufa’iga ma lona ofisa ona tapena ma tuuina atu i le Fono Aoao Faitulafono i tausaga ta’itasi. O le faai’uga o le masina na te’a nei o Iuni na tuuina atu ai lea lipoti ua faailoa ai e le Komesina o Sulufa’iga nisi o aafiaga o aiātatau e mafua i aiaiga o puipuiga o Samoa atoa mai le faama’i Koviti-19.
O nisi o aafiaga e mafua i le tapunia o tuaoi faavaomalo, le tapunia o le atunuu atoa, ma aafiaga o fanau i le motusia o a’oa’oga. Ua tuuina atu lea lipoti ma ni fautuaga e silasila iai le Palemene ma le Malo e toe tapena ai mo le lumanai pe a toe tutupu ni tulaga ma’ale’ale e pei o ni faama’i pipisi e lamatia ai le ola ma le soifua lelei o tagata.
O Setema o le tausaga na te’a nei e oo mai i le masina o Mati o le tausaga nei sa faagasolo ai sailiiliga a le ofisa o le Komesina o Sulufa’iga sa aoao mai ai finagalo o tagata ma fesiligia foi i ni aafiaga i o latou aiātatau, a o iai Samoa i taimi o faalavelave faafuase’i ona o puipuiga mai le faama’i.
