O le sefulu tausaga na avea ai le afioga Tiatia Faleupolu Tevita ma faamasino o le Faamasinoga o Fanua ma Suafa a le atunuu, na ia ausia ai le tulaga o le faamasino sinia seia oo i le tulaga Peresetene lagolago.
O le Aso Faraile ua mavae na faatino ai se tauaofiaga faapitoa poo le special sitting a le Faamasinoga o Fanua ma Suafa e faamavae atu ai i lea tamalii ua aulia tausaga o le soifua ua malolo manumalo ai mai lea galuega tāua sa auauna ma tautua ai i le Malo ma le atunuu.
O lea tauaofiaga faapitoa na toe faafofoga ai le Peresetene ma le sui Peresetene, o Peresetene lagolago ma alii ma tamaitai faamasino aemaise o faamasino o le Faamasinoga Maualuga ma le Faamasinoga Faaitumalo, i tala o le auaunaga a Tiatia a o galue o se faamasino o lea faamasinoga tāua a le atunuu.
O se tasi o Peresetene lagolago le afioga Mulipola sa saunoa e avea ma sui o faamasino o le Faamasinoga o Fanua ma Suafa.
O le susuga Tiatia Faleupolu sa galue i le vaega o lafumanu poo le livestock a le Matagaluega o Faatoaga ma faigafaiva i le tele o tausaga o lona soifua talavou seia oo ina talia lana talosaga e avea ma faamasino o le Faamasinoga o Fanua ma Suafa.
Se vaega o le saunoaga mai le afioga i le faamasino o le Faamasinoga o Fanua ma Suafa ua malolo manumalo susuga Tiatia Faleupolu Tevita.
O le saunoaga faafetai a le Peresetene o lea faamasinoga le afioga Lesatele Rapi Vaai na taualuga iai le tauaofiaga faapitoa a le Faamasinoga o Fanua ma Suafa o se faaaloalo maualuga a le faamasinoga mo lea tamalii sa galue o se faamasino ma Peresetene lagolago o le Faamasinoga o Fanua ma Suafa.
