O masini e pei o meapueata (web cams) ma nisi o meafaigaluega fa’aaoga i le galuega a leoleo lea ua faimeaalofa atu ai le Pulega o Leoleo a le Mālō Ausetalia le AFP mo le Matagaluega o Leoleo a le atunuu e fesoasoani ai i le faatinoga o galuega i puipuiga o le koviti19.
O le faauluuluga o le vaega Commander Daniel Evans na fai ma sui o le Pulega Australia Federal Police e tauaao atu lenei fesoasoani taua ma o se tasi o fesoasoani mai le tele o foai a lea Pulega mo leoleo a le atunuu.
Na talia ma le agaga faafetai e le Sui Komesina o Leoleo susuga Auapaau Logoitino Filipo ma na ia taua i le tele o taimi faigata ma feagai ai atunuu e lua ma faafitauli e tumau pea lenei faigapaaga e ala i se galulue faatasi ma le tele o meaalofa e fesoasoani ai i le galuega a malu o le Mālō a Samoa
O ia masini pueata ma mea faalogo (headphones) o le a telē le aoga i le galuega a leoleo aemaise lava o le taimi nei o loo pisi Samoa i puipuiga o le Koviti ma e manaomia le lelei o mea faigaluega e mataituina ai tagata e solia sa o vavao ma puipuiga.
O le faapaaga a Leoleo a Samoa ma Ausetalia ua leva ona amatalia ma ua oo sui nei i le 2 miliona tala Ausetalia le aofai atoa o fesoasoani, ma polokalame faapitoa ua faimeaalofa atu ai leoleo Ausetalia mo le Matagaluega i le silia ma le 2 tausaga.
