Ua i luma nei o le Fono Faatonu poo le Human Rights Council faavaomalo e feagai ma le lauliliuina o mataupu tau aiā tatau a atunuu o le lalolagi le folasaga a le Komesina o Sulufaiga a Samoa le afioga Luamanuvao Katalaina Sapolu ina ua tau aofia le fono faatonu i le vaiaso nei.
O le folasaga a le tamaitai Komesina o Sulufaiga na ia faailoa ai le lagolagoina o le malo o Samoa o fautuaga e 112 a le Fono Faatonu o mataupui aiā tatau o tagata soifua uma mai le aofaiga e 145 o fautuaga lea ua i luma nei o le Fono Faatonu.
Ua aofia i fautuaga ua talia i Samoa aiā tatau e maua ai e tagata uma auaunaga lelei tau soifua maloloina aemaise o loo faataua e le malo lea tulaga i tapenaga uma o loo faatino i le puipuia o le tatou atunuu mai le faama’i koviti19.
Na faailoa ai foi e Luamanuvao Katalaina Sapolu i lana folasaga le faafetai lea i le malo o Samoa i le lagolago atu i taumafaiga a lona ofisa o loo feagai ma mataupu tau i aiā tatau o tagata i le atunuu e mafai ai ona mulimulita’i i taiala o aiā tatau o tagata soifua e faasino lea i le maliega na faamautu i Pale i Farani.
Ua ia faafetaia ai foi e le Komesina le lagolago atu o sosaiete tumaoti i le atunuu poo le civil society i le faamaopopoina o le tapenaga ua tuuina atu i le fono faatonu o aiā tatau o tagata soifua o atunuu o le lalolagi e avea ai ma sao tuufaatasi a Samoa i le iloiloga a le Komiti faatonu.
E pei ona silafia o se isi galuega o feagai nei ma le vaega o Aiā Tatau o le Ofisa o Komesina o lana ripoti lata mai o aiā tatau o tagata i Samoa lea o le a tuuina atu i le Palemene i le ogatotonu o lenei tausaga.
