O le afioga Aliimalemanu Alofa Tuuau o le tasi o faipule na ulufale i le paeaiga lona 17 a le Palemene ona o le aiaiga o le faavae i le 10 pasene o nofoa faaopoopo o tamaitai.
O ia sa amata ai saunoaga a sui mamalu o le Palemene i le lipoti a le komisi suesue o faigāpalota lea ua iai le fautuaga a le komiti a le Palemene na iloiloina le lipoti a le komisi suesue, ia aveese le 10 pasene.
Na faamalamalama e le taitaifono o le komiti le afioga i le Sui fofoga fetalai, o le 398 o finagalo na faaali i le 10 pasene e fulisia i le aveese o lea aiaiga faaletulafono.
O i na fesiligia ai e le afioga Aliimalemanu Alofa Tuuau le taitaifono ma le komiti e lē fetaui pe a fua i le faitauaofai o le atunuu e silia i le luaselau afe tagata, ae fua e le komiti le latou fautuaga i le aveese o le 10 pasene i le na o le 0.19 pasene o le aofaiga o tagata na tetee i le 10 pasene mai le 398 o tagata na fesiligia e le komiti.
O le finagalo o le faipule o nofoa faaopoopo o tamaitai e lē tatau ona aveesea lea aiaiga ae ia faatumauina, auā o le amanaia lea o tamaitai i le auai i upufai o le Malo.
O le ootia o le sui faipule i le fautuaga e taofi le 10 pasene na tutulu ai a o saunoa i le mataupu.
O le tasi o sui faipule o nofoa faaopoopo o tina ma tamaitai le afioga Faagasealii Sapoa Feagia’i ina ua maua lona avanoa e saunoa ai, ua ia teena foi le fautuaga e aveese le aiaiga o le 10 pasene.
O loo faaauau pea ona soalaupule e le fonousu a Samoa le lipoti a le komisi suesue o faigāpalota ma fautuaga a le komiti a le Palemene na iloiloina lea galuega.
