O le ogatotonu o lenei vaiaso e toe faaauau ai taaloga o le sailiga o le siamupini o le lakapi mo aoga maualuluga i le atunuu.
O le Aso Gafua na faagasolo ai quarter finals lea sa molimauina le tumutumu ai o le malae o le Kolisi o Sagato Iosefo i Alafua, ae o le Aso Lulu lenei o le a faagasolo ai semi finals.
O le Aso Faraile e faia ai le sailiga siamupini i le vaega o ‘au a alii ma tamaitai i le vaega e i lalo ifo o le 18, 16 ma le 14 tausaga le matutua.
I le taaloga o le siisii uamea mamafa, o lea ua toe faaopoopo le foai tupe a le faletupe o le National Bank of Samoa mo tapenaga a le ‘au masii a le atunuu mo taaloga a le Olimipeka e faia i Farani i le masina o Iulai o le tausaga nei.
Ua faailoa e le faletupe le toe tuuina atu o le isi 20 afe tala mo ia tapenaga ma ua momoli ai le faafetai a le Peresetene o le faalapotopotoga siisii uamea mamafa le afioga Tuaopepe Jerry Wallwork i le pulega o le faletupe, i le talitonuina ma le avatu pea o le faatuatuaga a o tapena ai le ausiisii uamea mamafa a Samoa mo ia taaloga a le lalolagi.
