Ua faailoa e le ta’ita’i o le malo le afioga i le Palemia se tapenaga a le malo o le a sa’ili ai i paaga o malo ia e i fafo e pei o Niu Sila ma Ausetalia, se fesoasoani i le maua o ni faia’oga.
Ua māfua lea tulaga ona o le faafitauli ua leva o le utiuti o faia’oga, ma le faaletonu o faai’uga o su’ega a le fanau i nisi o kolisi ma a’oga maualuluga i lo tatou atunuu.
O le vaiaso mulimuli lenei o le tuuaga umi mo fanau o loo a’oa’oina i a’oga a le malo, ona toe ulufale lea i potu a’oga i le vaiaso fou, ma o se tasi lea o tapenaga a le Matāgaluega o A’oga ma Aganuu o se feiloa’iga a ulu a’oga ma faia’oga uma a le malo, ekalesia ma a’oga tuma’oti i le amataga o lenei vaiaso, a o lumana’i ai le toe foi atu o fanau a le atunuu i le amatalia o le kuata muamua faalea’oa’oga o lenei tausaga fou.
Le ta’ita’i o le malo afioga i le Palemia susuga Laaulialemalietoa Leuatea Polataivao Fosi i le feiloa’iga masani i le Aso Faraile ua mavae ma tusitala ma le aufaasalalau.
O le fale taalo o le taaloga soka i le malae o taaloga i le Apia Park ua tatala ai i le amataga o lenei vaiaso le fonotaga a ulu a’oga ma faia’oga uma i le atunuu.
