O le itumalo faapalota o Vaa o Fonoti o se tasi o itumalo e lē oo i se 2 afe tagata palota e na o le 1,630 e tusa o le aofaiga o loo faamauina nei i le latou lola palota talu mai le palota tele ia Aperila o le tausaga e 2021.

O aiga o le itumalo e 350 mai afioaga e iva o le itumalo ma o le faafitauli tele o loo feagai ma nuu taitasi o le taaloa o meaituaolo, ma satia ai taumafaiga o faatoaga aemaise le laau o le ‘ava, o loo pito ‘oa ai le laueeleele o Vaa o Fonoti.

E lua pusaoloa tetele poo containers o uta o pa puaa ma le pusaoloa o uaea mo pa povi, o le a amata tufatufa i le Aso Lua o lenei vaiaso o le taumafaiga lea a le itumalo i le atina’e o le tasi le miliona tala.

Faaalia e le tofi faipule o Vaa o Fonoti o le uta lea ua faaalu ai le 425 afe tala muamua o le vaegatupe muamua o le miliona tala i le tausaga faaletupe o loo faagasolo i le taimi nei, ma ua manatu le komiti o le faia o pa e tuu iai mea fafaga e pei o meaituaolo ma manu papalagi, o le a malu ai faatoaga, ma manuia ai seleselega a aiga o le itumalo.

Toe tasi le vaegatupe e 425 afe o loo totoe o le uluai miliona mo Vaa o Fonoti, ma ua faailoa e le sui faipule le tofa Mau’u Siaosi Pu’epu’emai, ua fuafua le seleni lea mo le polokalame o le ponesi a le itumalo, e amata totogi i le masina o Iulai.

O le taimi nei ua galueaina e aiga o latou fanua e faato’a i le laau o le ‘ava ma isi laau tau faatoaga, e fuafua i le ponesi.

Le afioga i le sui faipule o le itumalo o Vaa o Fonoti, le tofa Mau’u Siaosi Pu’epu’emai.