Na tuai ona faamatuu mai e leoleo le vaegatupe na aumai e le malo mo pisinisi na aafia ona o osofaiga a le au gaoi.

O le tala lata mai lea mai le minisita o leoleo Chris Hipkins, ma o lea foi na oo iai saunoaga a le tamaitai palemia Jacinda Ardern i le amataga o le vaiaso nei

O le $6 miliona na faailoa mai e le malo ia Me o le tausaga nei, o le vaegatupe lea sau mai le Proceeds of Crime Funds ma o loo faasoa e le matagaluega a leoleo

Mai lea taimi seia oo mai i le vaiaso nei, e tusa ma le 500 pisinisi agavaa peitai e na o le toalima lea ua mafai ona oo atu iai le faasoa.

Ua faaalia ai e le Palemia, ua manao ia vave ona faasafua lea fesoasoani mo pisinisi aafia.

Ae mai leoleo ananafi, ua faamautinoa mai e 40 asiasiga ua uma, 5 pisinisi ua uma ona faapipii pou nei e fesoasoani e puipuia ai, ma le isi toalima o loo faasolo nei.

Ua faaopoopo ai foi ma le aufaigaluega e fesoasoani i lenei poloketi.