Tu matila taleni a tamafanau a Samoa i le Super Bowl a Amerika

Ua manumalo le ‘au malosi a le Kansas City Chiefs i le suega siamupini o le lakapi faa-Amerika le Super Bowl na faia i le Aso Sa na faatoa mavae atu nei.

O se taaloga na iloga ai le taalo malosi o le alo o Samoa o JuJu Smith-Schuster mai le ‘au a le Kansas City Chiefs. O se vaaiga na iloga ona faaaliali mai ai le mitamita o JuJu i lona pito Samoa, o lona ulaina lea o le ulafala Samoa i le taimi sa faatalanoa ai lenei atalii e le autusitala. I le amataga foi a o agai ane JuJu i le malae o le taaloga, sa ia laeiina se sakete o se faaataga o le iefaitaga Samoa

E pei ona ta’ua i nisi a tatou tala i lenei taaloga o le Super Bowl, e toalua foi isi alo o Samoa sa taaalo i le Philadelphia Eagles, o Jordan Mailata ma Isaac Seumalo. Ma e ui ua lei tau lau o moemitiga ina ia manumalo le latou ‘au, ae o le taaalo ai o nei alo o Samoa i lea taamilosaga sili ona faitaulia i totonu o Amerika atoa le Super Bowl, o se matuā matati’a i soifua taaalo o nei talavou aemaise foi i le tapuaiga a mātua ma aiga.

E ese mai tamafanau a Samoa na faatinoina le taaloga, ae ua tu mati’e foi le igoa o Samoa i nisi o ana tamafanau sa lotolotoi i faafiafiaga na fai e tovā ai le ‘afa muamua o le taaloga.

O le tamaitai pese ma siva ta’uta’ua o Rihanna lea sa autu i ai faafiafiaga i le taimi o le malologa o le ‘afa muamua o le taaloga, ae na ta’ua i lipoti o le faafiafiaga atoa a Rihanna ma lana vaega uma sa lagolago atu i lana siva, sa faatonutonu pe a’o uma a latou taga e le tamaitai Samoa o Parris Goebel.

E le o se mea laititi lea na tumatila ai Goebel, aemaise foi isi alo o Samoa na sisiva ai, e pei o le alii talavou o Christian Segi. O Paris ma Christian ma le toatele o i latou e pei ona faailoa atu i le ata i lalo, o le toatele o i latou nei na soifua ane i Niu Sila, mai Aukilani i Saute, mai ni o latou tupuaga Samoa.

Paris Goebel and some of the dancers mostly from Auckland NZ with Samoan descents — Paris Goebel ma nisi o tupulaga talavou Samoa sa sisiva ai i le Super Bowl. O le toatele o i latou nei e soifua ane i Aukilani NZ

O le alii talavou o Christian Segi na tuputupu ane i Otara ma na aoga i le Manurewa High School ma o se talavou foi e naunau e ola mo le Alii, e pei ona iai i lana ekaleisa le Life Church i Manurewa.

O le Super Bowl LVII e pei ona mavae atu nei sa maimoaina e le tusa ma le 67,827 i le malae o le State Farm Stadium, i Glendale i Arizona, le nofoaga o le Arizona Cardinals, ae i le lalolagi atoa, sa maimoaina ai e le 113 miliona lenei taaloga mai luga o upega taifailagi.

O le tausaga fou 2024 o le a faia ai le Super Bowl LVIII i le Allegiant Stadium i Las Vegas.