O le Iuni a Europa ua na faatupe se tasi o fesoasoani mo le polokalame o le nofotane o loo faatautaia e le faalapotopotoga o le Toomaga mo ē Puapuagatia, e pei ona fausia ai ni fale ua avea ma maketi e faatau ai oloa eseese e pei o galuega taulima ae faapea foi fua o faato’aga.
O se fesoasoani a le Iuni a Europa na tuulima atu ai i tinā nofotane i nuu o Faleasiu, Siumu, ma Luatuanuu seleni ta’i lima afe tala mo le fausia o ia fale ua avea ma maketi, ae fesoasoani sui o le polokalame i totonu o ia afio’aga e faatupe isi tapenaga e pei o le kamuta.
Ua faaalia e le Pelesetene o le Toomaga o se tasi lea o polokalame ua amata i ia nuu i Upolu ae o loo fuafua e faasolo atu i isi nuu o loo iai le polokalame o le nofotane.
O le tatalaina o ia maketi ua avea o se tasi o polokalame o le 16 aso o tala’iga e tetee atu i sauaga faasaga i tinā ma tamaitai ma fanau teine laiti, ma o se polokalame o loo auai ma nisi o faalapotopotoga tuma’oti ma matagaluega a le malo.
O oloa ua faatauina i maketi ua mautū fale e faatino ai, o taumafaiga a tinā nofotane e maua ai seleni e fesoasoani i le tausiga o o latou aiga aemaise o fanau.
