E tolu manuao poo vaa tau o le fitafita o le sami ua amata aloaia i le aso Lua o lenei vaiaso o latou tiute o le leoleoina o ogasami uma o Samoa, ao amata le taligamalo a lo tatou atunuu i le fono a malo o le taupulega, lea o le a usuia i le vaiaso fou. O ia manuao e tolu e aofia ai le vaa o le Canterbury mai le fitafita o le sami a le malo o Niusila, o le manuao o le HMAS Choules mai le fitafita o le sami a le malo o Ausetalia, ma le manuao o le HMS Tamar mai le fitafita o le sami a le malo o Peretania.

I se pepa o faamatalaga o loo faailoa ai o le vaa tau o le malo o Ausetalia o le a nonofo ma faamautu ai le toa selau o leoleo mai atunuu e 11 o le pasefika o le a galulue mo le puipuiga o le saogalemu o le fono. E faaopoopo lea i le 260 fitafita ma tagata tomai faapitoa i le puipuiga mai le malo o Niusila.

O le vaa tau foi o Niusila ua aumai ai vaalele helikopa e tolu mo galuega lava o le puipuiga o le fono a malo o le taupulega. O le malaga mai o ia vaatau o le sami poo manuao, ona ose talosaga a le Malo o Samoa e pei ona faailoa ile pepa o faamatalaga.