Na tulai i le Faamasinoga Maualuga i le Aso Gafua le tamaitai tusi solo ma tala fatu o Papalii Sia Catherine Figiel, o loo molia i le fasioti tagata faamoemoeina, peitai ua lē tuuina atu sana tali i le moliaga ona e lei faamautuina moliaga uma a leoleo.

O le uluai valaauga o lenei faamasinoga i le amataga o le vaiaso nei, na faailoa ai e lana loia o Unasa Iuni Sapolu, e lua ni talosaga o loo fia tuuina atu mo se iloiloga ma se faaiuga a le faamasinoga, o le talosaga i le faasā ma tapu ona faasalalau faamatalaga e agai tonu i le gaioiga i le solitulafono ona o atugaluga o le loia, e ono aafia ai le maua o se avanoa o lē ua molia e faatino ai lona faamasinoga i se tulaga e lē mamafa pito tasi le sailia o le amiotonu.

O le tasi o talosaga e faatūtū lea i ni aafiaga o le mafaufau o lē o loo molia, ma e talafeagai ai ona faatino se suesuega faafomai e faamautu ai lea tulaga.

O ia talosaga a le loia mo lē ua molia ua faatonuina e le faamasino le afioga Fepuleai Ameperosa Roma e tatau ona faaulu ma tuuina atu i le faamasinoga, ona faailoa lea i le Aso Gafua o le vaiaso fou lea ua toe tolo iai se tali a lē ua tuua’ia, lea o loo faaauau ona nofo taofia pea i le vaaiga a leoleo i le falepuipui i Tanumalala.

O Papalii Sia Catherine Figiel e 57 tausaga le matua, o loo molia i le maliu o se tamaitai matua 78 tausaga o le soifua o se tagata tusi solo ma tala fatu, sa avea ma faiaoga o le Iunivesite o Manoa i Hawaii, ma o se tagatanuu o Amerika Samoa, o ia lea o Dr Caroline Sinavaiana Gabbard. 

Ua faatonuina e le pule o maliu poo le coroner se taotoga faapitoa e faamautu ai mafuaaga o le maliu o lē ua fano le soifua.