Pe ā ma le lua tausaga lea ua faatuai ai ona tatala le ward fou faapitoa mo le mental health a le falema’i a Palmerston North. 

O le nofoaga o loo faaaogā nei mo gasegase moomia le fesoasoani i le mafaufau, poo le ward 21 ua sau tala e lē toe aogā ona faaaogā i le mae’a maliliu ai o le to’alua masalomia na pule i o laua soifua i le 2014, ese ai lipoti o mataupu lava foi faapenei i le faai’uga o le tausaga ua alu. 

O le faai’uga o le tausaga nei na fuafua e tatala ai le ward fou, peitai i le fonotaga ananafi a le pulega na faamaonia mai ai loa o lea ua tuu i tua i le 2024 ma ē na o le 28 moega, e tutusa lava ma le ward o loo iai i le taimi nei. 

Ua sau ai ma le fesili poo le ā nei se isi fuafuaga mo gasegase e faatalitali ai le 2024, ae pe faafefea foi le faaopoopo o nisi moega. 

E le’i manino mai se tali i ia itu, pau o lea e foliga mai o loo fua uma lava i vaega o loo gafatia i le tupe ma o loo faaauau pea talanoaga i lenei mataupu e fuafua e faamae’a i le vaiaso nei. 

O le ward fou lenei na ioe mai ai le malo e faamatuu mai le $35 miliona e faatupe ai i le 2020.