O le faaiuga o lenei vaiaso na fuafua e faagasolo ai le taitoafitu masani a le kalapu a le Malisi peitai ua toe tolo atu nei i le masina fou.
O nei suiga o le a faataunuu ai lea taamilosaga i le Aso 25-26 o le masina o Mati. Ua atoa nei le 34 tausaga ai nei o tausaga o faia ai pea lenei taamilosaga lakapi taitoafitu faavaomalo.
Peitai o le lua ai nei o tausaga talu ona lē toe auai atu o Au Lakapi mai fafo ona o tulaga faigata o puipuiga o le faama’i Koviti19 e pei ona tapunia ai pea tuaoi a Samoa i faigamalaga masani.
O au e 8 pito i luga o le faaiuga o le taamilosaga i le tausaga na te’a nei ua agavaa mo avanoa e tausiniō ai i taamilosaga o lenei tausaga.
