O le Aso Lua o le vaiaso nei na faatulaga e amata suesue ai le tagi o faatosina solitulafono e mafua mai i palota laiti na faia i le faaiuga o le masina o Novema ua tuanai atu peitai o lea ua faailoa mai e se molimau faatuatuaina ua lē faataunuuina ae ua tolopo atu nei i le faaiuga o le masina lenei o Ianuari.
Ua toe tolopo ai foi le suesueina o le isi tagi lava o faatosina o le palota laititi ma e manino mai ai o nei mataupu e lua e faatoa suesue i lona tulaga o le valaau lea o molimau ma aumai ni faaiuga i le faasolo atu i le masina lona lua o lenei tausaga fou ma le masina o Aperila.
O le mataupu i moliaga o faalemigao I le faamasinoga lea o loo molia ai tagata e to’a 8 e aofia ai lē sa Palemia, o le sa Loia Sili, o lē sa failautusi o le fono aoao faitulafono faapea lē sa Fofoga Fetalai i le paeaiga lona 16 a le Palemene o le a toe valaau i le faaiuga o le masina lenei o Ianuari.
Faailoa e nisi o Loia o loo tauaveina mai tetee a i latou ua tuuaia e tatau ona faamautu i le valaauga lea le aso e tuuina atu ai finauga a Loia ma faia ai ma se faaiuga.
O le susuga Tuilaepa Lupesoliai Sailele Malielegaoi, o le tofa Lauofo Nuafesili Pierre Lauofo, o Lealailepule Rimoni Aiafi, afioga Leaupepe Toleafoa Faafisi, le afioga Savalenoa Mareva Bentham Annandale, le susuga Tiatia Graeme Tualaulelei, le afioga Maiava Visekota Peteru ma le susuga Sioeli Taule’ale’ausumai Alofaifo o loo molia i le fale migao i le faamasinoga le contempt of court.
