Tusia: Maina Vai
Ua toe tuuina atu mataupu e lua faatatau i tagi o le Palota Laitiiti mai itumalo o Sagaga 2 faapea ai Falealili 2 i le Aso Lulu, aso 16 o Fepuari e toe iloilio ai talosaga mai itu tagi ina ia faaui i tua a latou tagi na faaulu atu i le Faamasinoga.
I luma o a latou Afioga i Faamasino, le Afioga i le Faamasino Sinia ia Vui Clarance Nelson, Le Afioga ia Lesatele Rapi Vaai Faapea le Tamaitai Sui Faamasino Sili ia Niava Mata Tuatagaloa na tolaulauina ai mataupu nei e lua.
Mai le Itumalo o Falealili 2 na tagi ai le Leleimalefaga Neemia Fonotia faasaga ia Maiava Fuimaono Tito Asafo ma o loo tulai le tamaitai loia ia Magele Leone Su’a mo Fonotia ae o le Tamaitai loia ia Muriel Lui o loo tulai mo Asafo.
Na faailoa e le alii faamasino ia Nelson le talosaga ua faaulu atu e le itu tagi, ae ao ona faila atu nei a’o le i faaiuina le aso faamatalaga o maliega ia e pei ona taua i va o itu e lua, ona mafai lea ona faasalalauina i auala o fesootaiga i le aso a taeao a’o lei iloilo ai lenei mataupu i le Aso Lulu o le Vaiaso fou.
E faapena fo’i i le mataupu a Sagaga 2 i le va o Fata Maulolo Tavita ma Fata Ryan Schuster. Na faailoa e le Afioga ia Leiataualesa o le alii loia o loo tulai mo Fata Ryan Schuster o loo ua iai se maliega i le va o itu e lua e faaui i tua le mataupu, peitai o lea sa iai lo latou talitonuga e faasalalau muamua a’o le’i faaui ai i tua.
E ui i lea manatu o le itu tagi, ae na faatonuina e le Faamasinoga ina ia faila atu le talosaga atoa ai ma faamatalaga e ave ai i tua le tagi, faasalalau a taeao ae tolaulau ma iloilo e le Faamasinoga i le Aso Lulu o le Vaiaso fou.
E pei ona silafia o tagi nei o le palota laitiiti na sei mavae atu, ma o auala e ui atu ai se tagi ina ua iai se faiga faaalatua na faia i le taimi o le palota. O loo ua sauni foi itu tali e ave i tua ma latou foi tali i tagi nei, pe a maea ona faapepa mea uma ma tuuina atu i le Faamasinoga.
E ui e lei aloaia ona aveina i tua nei tagi i le aso, ae sa faailoa le agaga o le faafetai ma le faagaeetia mai le Tofa Fata Maulolo faapea ai Maiava Fuimaono Tito Asafo i e na latou tauva, e iai i latou na tagi faasaga ia i laua, i le tofa ua a’e ua masuiga malie ai nei mataupu, e le gata i lea a’o le faafetai i o la itumalo.
