O le Aso Gafua o le vaiaso nei sa faatulaga e su’esu’e ai molimau a leoleo i le moliaga o le fasioti tagata faamoemoeina o loo teena e le tamaitai tusi solo ma tala fatu o Papalii Sia Figel.
Peitai ua toe tolo atu nei i le aso 18 o Aokuso o le tausaga nei, ona o lea faato’ā taunuu lipoti o su’esu’ega faafoma’i i le soifua mālōlōina o lē ua molia aemaise o lipoti a foma’i o le gasegase o le mafaufau.
O le tolopo ai mo le isi 4 masina o lenei mataupu tau faamasinoga o le a avanoa ai loia a le itu a leoleo e silasila i ia lipoti o su’esu’ega faafoma’i, ae tapena ai foi loia a lē ua molia.
O loo faaauau pea ona nofo taofia i le falepuipui i Tanumalala le susuga Papalii Sia Figel ua 57 tausaga o lona soifua, e faatali ai le masina o Aokuso ua tolo iai le faamasinoga.
O le masina o Me o le tausaga na te’a nei na amata ona nofo taofia ai lē ua molia, ae o se talosaga sa faaulu e lana loia e tatala ai i tua i ni aiaiga, sa lē talia e lē ua molia ma o le mafua’aga lea ua savalia ai nei le 10 masina o loo nofo taofia ai pea i le vaaiga a leoleo.
