Ua faaali le faanoanoa tele o le alo tamaitai o se tamā matua, 76 tausaga le matua i le tulaga na ave ai fafo le masini manava e togafitia ai le ma’i sela a lona tama ua maua foi i le siama o le Koviti19, ae ua lē mafai ona ave i totonu o le Falemai Faaiutmalo i Poutasi e togafitia ai.
I se fesootaiga i le po anapo a le sui o le Radio Samoa ma le alo tamaitai o lea tama na ia taua ai le lē fiafia i le faatinoga o galuega a fomai, ua tūtū mamao ma ua fefefe ona e lē gata ua aafia le tamā matua i le siama ae faapea foi lona afafine na la malaga faatasi i le falemai le tamaitai ia Fa’alolo Sia Osa.
O lea tamaitai sa ia pueina le ata o lona tamā ma tuu i luga o le Facebook ma faailoa ai o loo saofai lona tamā i se nofoa e latalata ane i le fale e nofo ai le sikulatī o le falemai ma fai ai lana masini manava.
Taua e le alo tamaitai o lea tama “Na ave i le Aso Lua, last Tuesday e fai laga test ona aumai lea o le result e positive na fai mai lea e aumai e isolate ii le fale ae omai latou e asi mai, e oo mai ananei e le’i asia mai a. Ona la na faimai lo’u tama ua tau puni lana mānava na ala ai ona ma o loa le falemai, toe vili faatopetope le taavale ma o sei taumafai sana pamu e faakilia ai lana mānava ae ma oatu e lē mafai ona ma o, na ma o muamua fai ma swab ae maua ifo ai ua positive uma maua, ia o a’u la lea e malosi se’i vaganā ai lo’u tamā o lea tigaiga. Ma te le’i o i totonu na ave maua i autafa o le fale sikulatī lea iai le ata faimai e ave inā e fai ai lana masini ae ua amata ona ma’ulu’ulu ifo, ae alatu le fomai tele atu ana tala faimai mea lea e maua i le feoa’i solo, na o’u fai iai oute le’o fealua’i na ala ona o’u lavea ona o a’u lea tausia lo’u tamā”.
E le’i maua se fesootaiga ma le falemai i Poutasi mo se faamatalaga e tusa ai ma le faagaulēmalie o le alo tamaitai o le tamā matua ua maua i le siama o le Koviti19 lea o loo faanofoesea i lo latou aiga i Siumu.
