Ua amata tuli le faasalaga e lima tausaga o se tamā 42 tausaga o le matua o le nuu o Gataivai i Savaii ina ua faamaonia e le faamasinoga sili lona moliaga o le fasioti tagata pa’ivalea, ina ua ia umia se fafie tulou, ma togi ai le ulu o le tamaititi 14 tausaga le matua ma fano ai lona ola.

O le toonai a le aiga i se Aso Sa o le masina o Aokuso o le tausaga na te’a nei na tupu ai le solitulafono, ina ua to’atamai lē ua faasalaina, o ia lea o Afele Tiatia Laumatai ina ua lafo e lē ua maliu ni upu palauvale tulou, i lona tuaa tina. O le tamaititi 14 tausaga ua maliu o le nephew poo le atalii o le tuafafine o Afele. Faaalia i faamaumauga a leoleo na tuuina atu i le faamasinoga e faatatau i le solitulafono, o lē ua maliu a o fai le toonai o le Aso Sa sa nofo i lalo i tafatafa o le nofoa ae ua lē saofai lelei i luga o le laulau sa tali ai le sua.

Na faalii le tamaititi ma ia lafo ai ni upu i le tina o lē ua molia, ae le gata i lea na i’u ai ina togi i fafo e le tamaititi lana mea’ai. Na faaalia e leoleo na tu atu Afele ma ave le tamaititi ma pole i tafatafa o le tanoa fuluipu le zink ae na mamulu ese le tamaititi ma tamoe faavave ese. Na tuli e lē ua molia ma ia tago ai i se fafie ma togi ai le tamaititi ma lavea ai le pito taumatau o le itu i tua o lona ulu. Na aafia ai lē na lavea i ni auga o le niniva o lona ulu ma taavilivili. O le lua aso talu ona mae’a le solitulafono ae uma le ola o le tamaititi. 

O mafuaaga o le maliu, o se manu’a ogaoga ma tugā i le ulu, ma ua sao le palapala poo le toto i le fai’ai. O le lima tausaga ma le ono masina ua nofosala ai lē ua molia e toese ai aso na nofo taofia ai a o faia su’esu’ega a leoleo. O itu lelei mo ia o lana faatoesega ma le ifoga faapea lona ioeina o le solitulafono o le fasioti tagata pa’ivalea.

O le tamaititi na maliu i le faalavelave lenei o se tasi o le aumaliliu e to’avalu sa taofia i le falemaliu o le maota gasegase i Motootua e faatali se foma’i faapitoa e faia ta’otoga e saili ai mafuaaga o le maliu. O lea ua mae’a ona faia ta’otoga faapitoa i ni vaiaso e lei mamao atu, ma ua mafai ai ona maua le lipoti mo se iloiloga o le faai’uga a le faamasinoga ma ua avanoa ai foi ona faia toe sauniga o le tamaititi faapea isi tagata maliliu sa faatali i le foma’i e faia ta’otoga faapitoa.