Ua valaau mai le soifua maloloina i pasese na faimalaga mai Jakarta, taunuu i Sini i Ausetalia ma faaauau mai ai i Niu Sila i le Aso Lulu o le vaiaso talu ai e valaau vave le Healthline.
I se pepa o faamatalaga mai le Te Whatu Ora ananafi o loo moomia vave ma e tāua tele le valaau o le Healthline ona o le ono aafia o i latou nei i le misela.
O loo fai mai ai foi o le pasese ua faamaonia i le misela o lea o loo i Ausetalia.
E oo mai i le taimi e tuuina mai le ripoti a le soifua maloloina e na o le toaono le pasese ua mafai ona maua, ma o loo taumafai e saili le isi 29.
E le gata la o le valaau vave o le Healthline ae ua faatonuina foi ia nonofo i le fale e aua le feoai.
O le misela o se faamai e vave tele lona pepesi ma ua toe faamanatu mai le matagaluega i le tāua o le faia o tuipuipui o le MMR, ae afai e le mautinoa, ia faafesootai loa lau fomai.
