Ua 3 tausaga e lei toe vaaia ni tumutumu o tagata ni sauniga e faia i le laumua o le atunuu le taulaga o Apia ona sa tapuni faatasiga tetele i puipuiga o le faama’i.
Talu nei ona toe tatala faasaoloto faatasiga to’atele ua savalia nei le ono vaiaso o le faato’ā toe vaaia lea o se tumutumu i Apia i le taeao ona o le tauvaga o taavale teuteuina o le faamanatuina o le 50 tausaga o le faalapotopotoga o le faaputuga tupe o le lumanai manuia o tagata le NPF.
Amata mai i le alalaupapa simā i Vaisigano e tau atu i luma maota o le Malo i le eleele fou, na tumutumu atu le to’atele i le taeao o le Aso Tofi e fia tapua’ia a latou taavale teuteu na auai, ae faapea foi le isi to’atele o le fia apo ma le fia maimoa poo ai taavale o le a mau tulaga. O le afioga i le sui Palemia na saunoa i le faamoemoe o le NPF ina ua mae’a le sauniga lotu.
Le Sui Palemia o le atunuu afioga Tuala Tevaga Iosefo Ponifasio. O le afioga i le Komesina o le Matagaluega o Leoleo, Falepuipui ma le Ola Toe Fuataina sa faauluulu i se komiti na filifilia latou te faia le faai’uga i taavale e 15 na auai i le tauvaga.
O le latou faai’uga ua tuuina atu ai le manumalo i le taavale teuteuina sa tapena e le faalapotopotoga o atiina’e tau pisinisi a le Pasefika i Saute le SPBD poo le South Pacific Business Development, o loo faaune atu ai seleni mo pisinisi laiti a tina ma tamaitai, tulaga lua le taavale teuteuina a le autalavou a le ekalesia faapotopotoga kerisiano Samoa mai le afioaga o Apia, ae tulaga tolu ai le taavale teuteuina a le kamupani o le SSAB poo le Samoa Stationeries and Books.
Sa maua faailoga tupe e lē gata i taavale teuteu na mau tulaga ae faapea foi i taavale uma mai nisi o matagaluega a le Malo ma faalapotopotoga ma ekalesia sa auai i le tauvaga.
